ဘယ်သူသာသလဲ

အားလုံးသော မိတ်ဆွေအပေါင်း မင်္ဂလာပါ.....

အဆင်ပြေလေမလားလို့ Binance ထဲမှာပေးတဲ့ Crypto Box တွေရဲ့ Gift Code လေးတွေထည့်ပြီး လက်ဆောက်ရတာလေးတွေ လိုက်လုပ်ကြည့်တယ်။ ပြားဂဏန်းအဆင့်တောင်မရတော့ စိတ်မပါတော့ဘူး။ ထားလိုက်ကြပါစို့။ ရေးချင်တာကအဲဒီအကြောင်းအရာနဲ့ မသက်ဆိုင်သလို ကိုယ်နားလည် ကျွမ်းကျင်တာမဟုတ်တော့ ရေးပြဖို့ကလည်း အဆင်မပြေပါဘူး။ ဒီတော့ကာ ရေးချင်တာကို ရေးချင်ရာရေး အစီအစဉ်အတိုင်း ရေးကာတင်လိုက်ပါတယ်။

လူတွေဆိုတာကလေ အခြားတိရစ္ဆာန်တွေနဲ့ ပြိုင်ခိုင်းမယ်ဆိုရင် နိုင်ဖို့မဖြစ်နိုင်သလောက်ပဲ။ တိရစ္ဆာန်တွေထက်သာတယ်လို့ကြွေးကြော််အော်ဟစ်နေကြတာကတော့ အမြဲတမ်းပဲ။ တိရစ္ဆာန် တကောင်ကောင်နဲ့ လူနဲ့ အချို့အရာတွေကို ပြိုင်မယ်ဆိုရင် ရှုံးတဲ့သူဟာ လူပဲဖြစ်မယ်။ မယုံရင် ငါးနဲ့ ရေကူးပြိုင်ကြည့်၊ သိမ်း စွန်ငှက်နဲ့ အမြင်အာရုံ ပြိုင်ကြည့်၊ ကောင်းကင်မှာ ပျံသန်းတာပြိုင်ကြည့်၊ ဆင်နဲ့လွန်ဆွဲကြည့် ဘယ်သူက နိုက်မယ်ထင်သလဲ။ ဘယ်သူက သာမယ်ထင်သလဲ။ ဒီလိုကိစ္စတွေမှာ တိရစ္ဆာန်တွေက သာမှာပဲ။

အဲဒီလိုဆိုရင် လူက တိရစ္ဆာန်ထက် ဘယ်နေရာမှာသာ‌တာလဲ။ ဘာ့ကြောင့် လူက မြတ်တယ်လို့ပြောကြတာလဲ။ လူက တိရစ္ဆာန်ထက်သာနေတာက "အသိဉာဏ်"ဆိုတဲ့အရာသာဖြစ်ပါတယ်။ လူဖြစ်ပါလျက်နဲ့ အဲဒီ "အသိဉာဏ်"မရှိတော့ရင် အဲဒီလူ‌က တိရစ္ဆာန်ထက် အဆပေါင်းများစွာ ဆိုးသွားမှာပဲ။ အသိဉာဏ် မရှိတော့တဲ့အတွက် မတွေးသင့်၊ မကြံသင့်၊ မပြောသင့်၊ မပြုသင့်၊ မလုပ်သင့်တာတွေကို လုပ်‌တယ်။ ဘာတွေဖြစ်ကုန်နိုင်သလဲ။ ကောင်းတာ မကောင်းတာ အကောင်း နဲ့ အဆိုး အကြောင်း အကျိုးဆိုတာတွေမသိ‌ရင် အဲဒီလူရဲ့ပတ်ဝန်းကျင် အရင်ဆုံး ဒုက္ခများပြီပေါ့။

တိရစ္ဆာန်တွေမှာ အလွဲသုံးစားမှုမရှိဘူး။ လာဘ်စားတယ်ဆိုတာမရှိဘူး။ ကိုယ့်ထက်သာလို့ မနာလိုတာမရှိဘူး။ အသိဉာဏ်ရှိတယ်ဆိုတဲ့ လူတွေမှာတော့ ပေါလိုက်တဲ့ အလွဲသုံးစားလုပ်မှုတွေ၊ လာဘ်စားမှုတွေ၊ မနာလိုစိတ်တွေများလွန်း‌ပါတယ်။ အဆင့်အတန်းမြင့်ပါတယ်ဆိုတဲ့လူတွေဆီမှာ တိရစ္ဆာန်ထက် ဆိုးတာတွေ အများကြီးတွေ့ရမှာပါ။ ဒါတွေကို ဖာထေးဖို့လည်း အကြောင်းပြချက်တွေ အမျိုးမျိုးရှိနေကြမှာပဲ။

သတ္တဝါအားလုံးတို့သည် မိမိပြုသော ကောင်းမှု မကောင်းမှုသည်သာ ကိုယ်ပိုင်ဥစ္စာ ရှိကြကုန်၏။

အားလုံးကို လေးစားလျှက် -

@ansoe