အိုပယ် အိုပို အိုအမှိုက်

အားလုံးသော မိတ်ဆွေအပေါင်း မင်္ဂလာပါ.....

နွေရာသီလိုကာလတွေ မိုးရာသီလိုကာလတွေမှာ နေရောင်ဒဏ်ကို ကာကွယ်နိုင်စေဖို့ မိုးရေစိုရွှဲတဲ့ဒဏ်ကို ကာကွယ်နိုင်ဖို့အတွက် ထီးတစ်လောက်တော့ လိုအပ်ကြမှာပါ။ အဲ-ထီးကြော်ငြာမလို့မဟုတ်ပါဘူး 😁 ထီးကြော်ငြာထင်မှာစိုးလို့ပါ။ ကိုယ့်ကို ဘယ်ကုမ္ပဏီကမှ လာပြီးတော့လည်း ကြော်ငြာအပ်နေမှာမဟုတ်ပါဘူး။ မော်ဒယ်ဂွဲလေးတွေကိုပဲ အပ်ကြမှာပေါ့ 😂 ရေးချင်တာတောင် ပျောက်‌တော့မှာပဲ။ ဆက်လိုက်ပါအုံးမယ်။

ထီးဆိုတဲ့အရာက နေပူနေတဲ့အချိန် မိုးရွာနေတဲ့အချိန်တွေမှာ အသုံးပြုတတ်ကြပေမယ့် နေရိပ်ရသွားတဲ့အခါ မိုးမရွာတော့တဲ့အချိန်တွေမှာတော့ ထီးက ဝန်ထုပ် ဝန်ပိုးတစ်ခုလို ဖြစ်သွားရတယ်။ ကိုယ်စာတွေရေးနေရတဲ့ ဖောင်တိန်တို့ ဘောလ်ပင်တို့ဆိုတာမျိုးတွေဟာလည်းပဲ မှင်ရှိနေတုံးသာ တန်ဖိုးထားတတ်ကြပြီး မှင်ကုန်သွားလို့ မှင်မရှိတော့တဲ့အချိန်တွေမှာတော့ အမှိုက်ဖြစ်သွားတော့တာပဲ။ အခြားအရာအတော်များများလည်း အဲဒီလို အချိန်တစ်ခုလောက်ကြာရင် အမှိုက်ဖြစ်သွားတတ်တယ်။

သိပ်လှ သိပ်မွှေးတဲ့ပန်းတွေဟာလည်း အချိန် အတိုင်းအတာတစ်ခုအတွင်းမှာ အမှိုက်ခြင်းတောင်းထဲမှာ ဇာတ်သိမ်းသွားကြရစမြဲပါ။ ဒီတော့ လူတွေဆိုတာဟာလည်း ကိုယ့်ကို အသုံးချလို့ရနေသေးသမျှတော့ တန်ဖိုးထားတတ်ကြပြီးတော့ အသုံးချလို့မရတော့တဲ့အချိန်ကိုရောက်ရင် အသုံးမကျတဲ့ အမှိုက်အဖြစ်ဆက်ဆံကြမှာပဲ။ ရာထူး ငွေကြေးဘယ်လောက်ရှိရှိ တချိန်မှာတော့ အမှိုက်ဖြစ်သွားကြရတာပဲ။ ဘာ့အတွက်ကြောင့် မာန်တက်ပြီး ရန်ဘက်လုပ်နေကြအုံးမှာလဲ။ မငြိမ်းချမ်းတဲ့လောကကြီးမှာ တိုတောင်းတဲ့လူ့ဘဝကိုဖြတ်သန်းနေကြရသူချင်းအတူတူ ဘာတွေ ဘဝင်မြင့်နေကြအုံးမှာလဲ။

အသက်တွေကြီးလာလို့ အိုမင်းလာတဲ့အခါ မျိုးဆက်သစ်ဆိုတဲ့ လူငယ်တွေက ကိုယ့်ကို အိုလို့ ပယ်မှာပဲ။ အိုလာရင် အိုပယ် ဖြစ်တော့တာပဲ။ အိုလာရင် လူပိုတစ်ယောက်ဖြစ်သွားတတ်ပြီးတော့ အိုပိုကြီးလည်းဖြစ်သွားမှာပဲ။ လူ့ဘဝခဏတာ ရလာတဲ့အချိန် အိုပယ် အိုပို မဖြစ်ခင်ကတည်းက ကိုယ်တတ်စွမ်းသမျှ တတ်နိုင်သမျှ ကောင်းတာလေးတွေလုပ်ရင်း ပျော်ပျော်ရွှင်ရွှင်နဲ့ ဖြတ်သန်းသင့်ပါတယ်။ အိုပယ် အိုပို အိုအမှိုက်တွေမဖြစ်ခင်ကတည်းက ကိုယ့်ပတ်ဝန်းကျင်ကို ကောင်းကျိုးပြုသူဖြစ်သင့်ပါတယ်။ ကိုယ့်နောက်ပါလာမှာက ကိုယ်လုပ်ခဲ့တဲ့ ကုသိုလ် အကုသိုလ်တွေပဲဆိုတာ မမေ့ပါနဲ့။ ငြိမ်းချမ်းတဲ့ခရီးလမ်းကို လျှောက်လှမ်းနိုင်ကြပါစေ။

သတ္တဝါအားလုံးတို့သည် မိမိပြုသော ကောင်းမှု မကောင်းမှုသည်သာ ကိုယ်ပိုင်ဥစ္စာ ရှိကြကုန်၏။

အားလုံးကို လေးစားလျှက် -

@ansoe